2Jo | EMI | STEP |

Aiaaghaluene atikirighi uru ngai Jon ghe pitiela

2 John

1 Aghi Jon, namu ngateva,

Apitipiti uru ngai etikirighi eatuetu etam, masi kapughu vause ateva, God ghe suiematoongainiola, me natum atoa. Aghaielousieinam tale voto akapa koronna, me karika va aghi nonga ta lo atoa tee la kilakila voto koronna. 2 Aghaielousieinam poli voto koronna etokatoka etaita me aue etoka etaita nau ekapa atoa.

3 Alooloo sae va maamasinaane, nikkaluaa, me luei kanna God Tamaita ia me Iesu Karisto Natuna ia God, aue toka aitaua teeita poli am ghe aiesoaala me am aielousia voto koronna ghe auliaala.

4 Etautau mae kinatama nimasimasi etaghi tani kila va katoa natum la kasukasu tale salana koronna nongina Tamaita ateva ghe auliaala va ita ghelei. 5 Me ia oia, masi kapughu vause ateva, karika apitipiti etam tani aulia righi ouna voto tani ghelei, ta anim aulia voto ita ghe ghaala tale aitiutiu, va God ekookolomi va ita aielousia kateva kateva. 6 Me niaielousi eteva ia avalua toko va ita kasu tale ninongo usila tale voto ghe auliaala va ita ghelei, nongina am ghe nongola tale aitiutiu. Voto ghe auliaala isaa avalua toko va am kasu tale niaielousi.

7 Oroieili tau nikamekame atoa, karika la aulia ngaotu va Iesu Karisto ghe taumattula. Ngila ghe kasu ekapa seela tale kosa ateva, me isaa o ase taumattu, tau nikamekame ila, me tau ngai ssateena ila Karisto. 8 Am paniem ta tau nikamekame atoa ta am rau velu voto ita ghe uunguaala ta aue am ghaa akapaaili aipolipoli. 9 Lo ateva eilou emuemue me eruu tani kasu tale niapasunga kanna Karisto, God karika ia etana, me lo ateva ekorokorongana tani kasu tale isaa o niapasunga, Iesu me Tamane lalu tokatoka etana. 10 Arova teva emae etaimim me karika eatua isaa oia niapasunga, am rau mene ghaaia va esso tanganueimim me am rau mene aikoloainia. 11 Lo ateva eaikoloainia, ie tee egheelei isaa o uunguaane sesa.

12 Oroieili voto aghanna tani piti tau aatu etaimim, me karika aghalona tani piti tale uru ngai me aipitipiti etiulu, poli aghaiesoa tale ninanna va aue amae taraiem, me ita aippooa. Nau ita aitara, aue masimasiaaita enamungaili.

13 Natuna atoa nengam vause ateva God ghe suimatoongainiela la suula masimasiaaira etam.